११ मंसिर, काठमाडौं । सर्वोच्च अदालतले ‘तीन वर्षभन्दा बढी अवधि अलग बसेको आधारमा मात्रै पतिले पत्नीसँग सम्बन्ध विच्छेद गर्न नसक्ने’ व्याख्या गरेको छ । दाम्पत्य जीवनमा भएको बेमेलका कारण जिल्ला अदालतबाट सुरु भएको एक सम्बन्ध विच्छेदसम्बन्धी एक मुद्दाको व्याख्याका क्रममा सर्वोच्च अदालतले यसको कानूनी धरालतवारे नयाँ व्याख्या गरेको हो ।
तीन वर्ष अलग बसेको आधारमा मात्रै पतिले पत्नीसँग सम्बन्ध विच्छेद गर्न पाउने नजीर बनाउने हो भने दाम्पत्य जीवनमा बेमेल हुने जो कोही पतिले पत्नीलाई घरबाट निकाल्ने वातावरण बन्ने र त्यसबाट सम्बन्ध विच्छेदको आधार सिर्जना हुनसक्ने भन्दै सर्वोच्च अदालतले यसले सामाजिक सन्तुलन नै खल्बलिनसक्ने औल्याएको हो ।
पारिवारिक वा दाम्पत्य जीवनमा बेमेल हुनासाथ पति वा पतिका परिवारका सदस्यले पत्नीलाई घरमा बस्न नदिने अवस्था हुनसक्छ । अर्कोतर्फ कलह वा अन्य कुनै कारण पत्नी घरमा बस्न नसक्ने वातावरण बनेमा बाध्य भै माइती वा अन्यत्र कतै बस्नुपर्ने अवस्था सृजना हुनसक्ने सामाजिक परिवेशलाई औल्याउँदै सर्वोच्च अदालतले नयाँ न्यायिक मत प्रतिपादन गरेको हो ।
डा.नहकुल सुवेदी र टेकप्रसाद ढुंगानाको इजलासले गरेको फैसलाको पूर्णपाठमा भनिएको छ, ‘विवाह र परिवार सम्बन्धी सामाजिक पक्षलाई अनदेखा गरी तीन वर्षभन्दा बढी लोग्नेसँग अलग बसेको अवस्थालाई मात्र सम्बन्ध विच्छेदको आधारका रूपमा यान्त्रिक तवरले ग्रहण गरियो भने कानूनी व्यवस्थाको न्यायोचित अर्थ गरेको मानिंदैन ।’
